Manchester City dhe trajneri i tij i ri, Pep Guardiola, nuk do ta fitojnë titullin këtë sezon, të cilin e rrëmbeu Antonio Conte në vitin e tij të parë te Chelsea.

Një eksperiencë krejtësisht e re për trajnerin që zakonisht ishte mësuar të fitonte trofe me klubet e mëparshme ku kishte drejtuar, Barcelona-n dhe Bayern-in. Guardiola është shprehur në lidhje me këtë çështje gjatë një konference për shtyp përpara ndeshjes me West Bromwich-in .“Në situatën time, në një klub të madh, do të isha shkarkuar. Isha nën presion duke qenë se vija nga një klub si Barcelona.

Në një klub të tillë, nëse në 6 muaj nuk fitoni, atëherë jeni jashtë. Te Barcelona apo te Bayern Munih, ju duhet të fitoni patjetër. Nëse ajo që vjen sezonin tjetër nuk është e mirë, atëherë do të ndryshohet trajneri patjetër, por unë jam i lumtur që kam një shans të dytë. Isha nën presion kur erdha këtu, duhet t’i provoja vetes se isha i aftë t’ia dilja në këtë klub fantastik. Besoj se cilësia e lojtarëve ishte e mjaftueshme për të bërë më mirë”, ka thënë Guardiola.